難得阿女話陪我行山，當然選一條比較容易行的。
2008年8月24日，星期日。
雖然是「鸚鵡」九號颱風後的第二日，但天色晴朗。
2008年7月2日星期三
2008年4月14日星期一
黃龍坑、大東山、地塘仔、石門甲
14-04-2008，星期一。天色晴朗，間中有霧，氣溫22-26℃。
全行黃龍坑郊遊徑，上爛頭營，登大東山，落伯公坳，轉入地塘仔郊遊徑，經石門甲，返東涌散隊。行程約4.5小時。
2008年4月13日星期日
2008年4月8日星期二
2008年3月22日星期六
2008年1月3日星期四
東涌至大澳
2007年最後一日，12月31日，星期一，當日氣溫突然驟降至10度，雖然有陽光的照射，仍然感到有些少寒風刺骨，但卻無阻大約30多人參加遠足的興致。
當日早上0900hrs.前，我準時到達「東涌消防局」門外集合地點會合隊友起步。今次「翠綠」安排的路程是由東涌「逸東」開始轉出海旁綑邊走，經侯王宮，沙螺灣村，訪千年樟樹，散石灣，深屈，出大澳散隊。行程大約需時4.5小時。
大隊由東涌消防局沿大馬路前往逸東，無須進入屋，按觀光標記指示牌，在屋旁的小路轉入首個景點是「候王宮」。大家在這裡影影相，或去洗手間。經過領隊講解當天的行程大綱，就開始一路向小路前進。
大概行了20分鐘左右，就會看見昂坪360纜車在頭頂上空滑過，當日更是纜車發生墮車重大事故之後，重新正式公開載客運作的第一天，還可以聽到乘客在車廂內談話的聲音，覺得很特別，到底「信心」的價值觀如何釐定，我在想：因人而異吧。在這附近有一個石級路口，正是昂坪纜車步行徑，是一直通往昂坪山上，據資料顯示，因為是上山的原固，大概要行4個小時，是非常辛苦的。若體能一般者，其實可以考慮由昂坪山上向下行，那樣就比較舒服些，適隨尊便。（待續）
2007年12月23日星期日
又再行龍門郊遊徑
今日12月23日星期日，再次相約舊同學行山，路線仍然是「龍門郊遊徑」，由城門水塘行去川龍。千萬別感到奇怪為甚麼重覆相同路線，因為我地的目的旨在聯繫友誼，雖然係路線相同，但有著不相同的話題，吹吹牛。噴噴口水，不亦樂乎。
今次出席者有：楊滿樑、Peter、Lin Lin、阿銓、Jenny、阿榮、潔華、我，和第一次加入的卓妙芬，一共九男女。
猶記得上次11月11日，大家於起步初段，那400米上斜，走起來上氣不接下氣，喘聲如牛，但今趟走起來就輕鬆多了，果然鍛煉是有成果的。所以城市人是應該在假日多多參加戶外活動，按各自的體質和能力做一些運動，以減輕出現都市病。
今次有一件事要特別提提，就是阿銓帶了一部貴價單鏡數碼相機來，讓我開眼界之餘，兼讓我全程自由拍攝。我將之掛在頸上，心中泛著滿足感。我就不懂拍攝的技巧，只懂得全用auto，幸好有阿銓同埋阿榮兩位從旁指點，才對快門，光圈等有些認識。但那部相機就真的「冇得頂」，感覺到裡面d機械陏動非常順滑，靚即係靚。
若以後遇到有需要，我都會厚著臉皮向阿銓商借呢部相機一用，譬如去影：濕地公園、海防博物館、或者名勝古蹟等。
至於今日的行程內容跟上一次一樣，沒有甚麼特別。值得一提只是當我地到了川龍，就進了「彩龍茶樓」飲茶。
2007年12月21日星期五
陽明山莊至天后
12月17日，星期一，天陰但沒有下雨。當日「翠綠遠足隊」安排的路線是由「陽明山莊」至「天后」。
大隊相約0900hrs.在中環「交易廣場」集合，乘搭6號巴士到半山「黃泥涌峽道」油站起步。首先向「黃泥涌水塘公園」＆「陽明山莊」的指示方沿著馬路向上行走，大概15分鐘後就會到達「港島衛奕信徑」二段入口。在入口側邊的石級豎有指示牌「渣甸山」與及「奧斯本紀念碑」，我地就是從此石級向渣甸山出發了。經過大約30分鐘的不斷上斜向山頂行，真的有d吃力。不過，每次行高少少，可以看見的景觀就會有少少變化，心境亦隨之越見開朗。當陽明山莊開始遠離身後，眼前的「中環」及「維港」在煙霞中的景色卻又開始令人著迷，這就是遠足行山的樂趣之一。隨後當行到「小馬山」，同樣的情景亦出現，只是景點變換成「魚涌」、「寶馬山」和對面海的「紅堪」等。每當遇到怡人的風景，心底裡都會浮現出：總算不枉此行。
聽隊中的前輩講，今次的路線其實很短，只有「渣甸山」和「小馬山」，如果按正常計算，此行程實際不需三個小時就可結束。但領隊團為了增加趣味，讓隊友練練體能，就在行完「小馬山」後，加入「金督馳馬徑」。此徑是繞著山腰而成，是港島一條相當出名的健身徑。
最後我地到達「畢拉山道」再轉「大坑道」行落山，直到「銅鑼灣」中央圖書館散隊，時間已經是1500hrs. 全程大概行了5個幾小時。大隊大部份隊友都相約去茶樓飲茶，而我則選擇順道去「柏寧酒店」探舊同事。
2007年12月19日星期三
塘坑至流水響
12月10日，星期一，晨早六點幾起床，感覺雙腿的肌肉狀況還可以，因為星期天才剛走過一轉城門水塘到大帽山，於是膽粗粗的決定跟「翠綠」去遠足行山。今次係由粉嶺「塘坑」至大埔「太和」，預計需時5個半鐘。斷估唔到，今次要中途投降離隊歸家，真的羞家。這亦說明一個道理，凡事不可以太高估自己，有信心是好的，但亦要理智去評估，別讓興奮的心情，大眾的聳踴，就魯莽作出決定。對我來講，今次是一個少有的教訓。
大隊在粉嶺火車站集合，準時0900hrs.起步，首先沿空中走廊穿過私人屋菀「粉嶺名都」＆「粉嶺中心」，然後落「新運路」，不用入「祥華」而沿大馬路直奔「塘坑」村。由塘坑村路口入村，大概行15分鐘就會到路的盡頭，見到「配水庫」就要轉上山喇。
由配水庫左邊鐵絲網側的小徑行上「龍山」，龍山山高360米，因山腳另一邊建有「龍山寺」而得名。基本上所謂上山，係指一直不斷的上360米，雖然中段有一個山腰窩位可以休息，但無補於事。除了配水庫附近一小段之外，整個上山路程都是無遮無掩，當天太陽又似乎特別猛烈照射，令到我覺得很辛苦，頻頻休息和飲水，講得難聽d，真有「中暑」的徵狀。好不容易到達山頂，當然又要休息休息，因為我與隊尾相差大概10分鐘，但與隊頭就拉開差不多25分鐘喇。
在龍山山頂遇到一班地政測量工程人員，大家閒聊一番，佢地都欣賞我地呢班老人家有毅力個個禮拜行山。我見機不可失，當然推薦由周校長介紹「翠綠遠足隊」，原來有工程人員都從電視聽過「翠綠」事蹟。我趁校長同佢地寒喧及派咭片時就開始繼續向前行。
開始落山時，可以看見「流水響」一帶的風景地貌。原來龍山是獨立一個山，我的意思係，通常上完山，多數由山脊行過去第二個山，而今次卻係異數，即係話要直落360米，簡直係要命。不過，行山就係咁樣，有好多時係考驗毅力同埋要預接受挑戰。我在呢段落山路程都跌倒過兩次。又好不容易落到「流水響」會合大隊，其實係前面的隊友等我地隊尾。
當我在休息飲水時，發覺帶來的水唔足夠，兩大支水只剩半支，兼且體力已經透支八八九九，而聽陳領隊講還要再上一個400m的山，行程大概要再行多兩個幾鐘。衡量過各種因素，我決定提出在流水響離隊。反而大家聽了原因之後，都覺得我的做法明智，行山首要係量力而為，免得中途出事，最終累己累人。領隊指點了如何行出大路去搭小巴，還交帶我照顧一對夫婦，原來佢地係隊尾最後一啤，都係行唔掂要撤退。我地3人用1個鐘沿「流水響道」一路行出「沙頭角公路」搭小巴返粉嶺火車站。總計今日行4個鐘多dd。
2007年12月14日星期五
城門水塘到大帽山
為了遷就每個星期一要跟「翠綠遠足隊」行山，所以星期日都盡量休息，儲備體能應付翻山越嶺，爬高落低。固此，已經兩個星期天沒有約街坊好友，阿榮，阿勝同埋阿果行山。其實當初就係佢地幾個鼓勵我行山減肥的。所以，12月9日，星期日，我地就由城門水塘出發，經鉛礦凹轉上麥理浩徑第八段，直奔大帽山山頂雷達站，然後落荃錦凹，於荃錦公路搭51號巴士返荃灣收隊。當日陽光普照但並不太熱。因為是星期天的關係，整個路段都遇到很多其他自組的遠足隊經過，其中一隊係「山林」。另外又有很多參加甚麼獎勵計劃的青少年，分成多個小隊，拿著地圖，背著背囊；開心的有，苦口苦面的有，大汗夾著細汗的向目標前進。令到此路徑非常熱鬧。
由鉛礦凹上大帽山，亦即麥理浩徑第八段，一開始就要行大概150米的石級或斜坡，真的很辛苦。沿途需要休息幾次才到山脊，之後的路程就比較平均，上落差不多，而且景觀開揚，易行好多。去到大帽山雷達站，當然少不了要影相留念。最後沿石屎車路行落荃錦公路搭巴士到荃灣，全程大概5個鐘。阿果請大家去「唯一」食上海麵+荳槳。
備註：12月13日，星期四，亦即相隔3日後，我獨自一個人再重走此路線，這次由大帽山荃錦凹開始行返城門水塘，同一路線，只是反方向行，全程大概4小時完成。主要原因是上大帽山是石屎車路，比較好行。而落鉛礦凹條長石級，相對於上石級，始終比較舒服d。
2007年12月12日星期三
走向圍城
天水圍，一個最近時常上報頭條的城市，一個成為大眾茶餘飯後討論的城市。今次「翠綠」的遠足路線就是由元朗朗屏至天水圍天澤。03Dec星期一，當日早上0900hrs.我和阿樑到達元朗西鐵「朗屏站」B出口會合大隊，出發後穿過「朗屏」平台，然後過馬路於「鳳池村」側邊小路上山，在一處小涼亭唱過隊歌後，就開始走上「丫髻山」。丫髻山高度只有121m高，大概是元朗西面唯一的小山。登上山頂可以飽覽元朗「橫洲」一帶，包括工業村，漁塘，天水圍及屏山。在山頂小休一會就起行落「盛屋村」，沿「福順街」走一小段之後開始轉入漁塘。穿梭於漁塘間的感覺很特別，欣賞那寧靜的環境，喜歡那簡單的生活，遠離煩囂鬧市；看見養魚戶夫婦，甚至是那隻小唐狗，都是很悠閑的。心中不其然問：『城市人啊，你甚麼時候才可以回歸大自然，返朴歸真？但你能適應嗎？』。
穿過了無數個漁塘，輾轉到了「邊境路」，估名思義，這是一條沿著香港北部邊界的道路，一邊建有高高的鐵絲網，以防止偷渡，鐵絲網的另一邊就是我們的祖國喇；馬路闊度僅夠一部車輛行駛。一條平路直奔到「尖鼻咀」為止，平平無奇。值得一提的是多年前在「山貝河」發現一條小鱷魚，弄得政府大費周章，幾經辛苦才將小鱷魚捕獲，市民改了個名叫「貝貝」，現在飼養於「濕地公園」內。
到了尖鼻咀，先會見到一座白色的小警崗，然後在偌大停車場的馬路邊是「觀鳥區」，供遊客觀賞「后海灣」出現的候鳥群，並設立了圖文並茂的雀鳥類別講解指示牌以供參考。如果喜歡更廣闊的景觀可以步上「唐夏寮」觀鳥亭。我們整隊人就在唐夏寮觀鳥亭大休，邊午膳，邊觀鳥，適隨尊便。
大休後就穿過樹林向「輞井圍」出發，呢一段路會見到很多新界原居民的祖墳。很快就到了輞井圍。在出天水圍途中，其中一位女隊員碰巧遇到相熟的校巴司機，順道載隊員到「流浮山」飲茶，大部份人都跟車去了，大概只有八個人，包括我和阿樑，繼續行出天水圍。最後到了「天澤」天澤商場，全程完畢，大約4.5小時。我們乘搭264M巴士返青衣機鐵站。
此路程只有一個不太高的丫髻山，頗為舒服易行。很高興能夠同阿樑一起行山。祝阿樑身體健康，生活愉快。
2007年12月11日星期二
港島「龍脊」徑
風和日麗、景色怡人，心懭神怡，都可以用來描述今次的遠足——香港島小西灣至大潭。26Nov星期一，當日0900hrs.在小西灣藍灣半島側的小公園集合後起步，首先步上通往「龍躍徑」的石級，接「歌連臣角道」，這一小段路是當區熱門的健身徑，沿途不斷的遇到晨運人士，男女老幼都有。行到「龍躍公園」的分叉路口左轉，在哥連臣角懲教所前不遠處有一涼亭，看見「馬塘坳」指示牌右轉上「砵甸乍山」，呢一段係不停的上斜，確實考驗體力。但當我到了一處開揚的地方，看見大海和「東龍島」，就有一刻忘記辛苦了。
小休一會，大隊又繼續向「龍脊」進發，龍脊是指一段很長的路徑，並非一個景點，例如「麥理浩徑」。沿途上落差不大，兼且行走於山脊，兩旁風景盡入眼簾，左邊看見有大浪灣、石澳灣，而右手邊又可看到紅山半島、遠眺赤柱和舂坎角等；加上又有微風送爽，真的令人心懭神怡。
到達「打爛埕頂山」大休，這裡是今次行程最高點284M；麵包、飲料、水果各隨尊便，因為是自備的。經過休息、吹水、聯誼、拍照後就係落「石澳道」，有部份隊員在這裡因為各自的理由選擇搭巴士離開，正如領隊話：『翠綠精神，隨時走人』，非常隨和的宗旨。
我不管三七二十一，照跟大隊橫過石澳道行落「土地灣」，這是一個很細的海灘，完全沒有甚麼看頭。跟住就綑邊經過兩條村，看見有些人家將房屋裝飾得非常悠閑渡假feel，心裡盡是羨慕。之後又要上一段斜路後就踏入港島徑第八段，沿石碑山引水道出大潭道近水壩散隊，全程剛好5個小時。
翠綠隊員大夥兒相約去「筲箕灣」飲茶食飯，而我自己就搭小巴返回「柴灣」轉地鐵回家。第一次行港島線，很開心，增加見識。
相片已經放在右手邊「相片集」，歡迎瀏覽。
2007年11月24日星期六
千山我不獨行
香港電台電視部制作「黃金歲月」13Nov在亞洲電視播放的一輯「千山我不獨行」，講述一群長者如何結伴遠足和旅遊，據粗略估計，包括本地及境外旅遊在內，這些年來佢地大約行過了十萬八萬公里；這確實豐富了退休後的生活，譜寫精彩的晚年。於是在好奇心驅使下，19Nov，星期一，決定跟「翠綠遠足隊」行山。當日早上0900hrs，在粉嶺火車站集合後，乘搭56K專線小巴至鹿頸，由於候車需時，延至十時，才在雞谷樹下，唱隊歌(在森林和原野)後起步。沿著海旁，經鳳坑，至谷埔登山，左轉老虎石頂，大休後，經攀背頂，落荔枝窩，小休一會，再上分水凹，沿路返回谷埔，於下午1600hrs.在鹿頸散隊，全程6小時。
今次要講的是「翠綠」的作風，可能因為「黃金歲月」的播出，當天的新界西北遠足，在54 位參加者之中，連我在內竟有差不多20 位是首次參加的新人。三位領隊非常和藹可親，照顧隊員非常細心，有講有笑，有問必答；而且三人各司各職，分工合作，實在令新人欣賞。其他舊隊員亦有顧及新人而沒有一味向前行。好似我都在中途失足跌倒兩次，每次都有隊員走過來協助及慰問，相當難得。
總結此行是非常開心的，況且沿途風景確實美麗，天氣又好。雖然中途有些路段要越叢林，以及落斜坡，但也夠刺激。下次若路線適合，一定再參加「翠綠」。
最後要一提的是，意料之外在「翠綠」竟遇到多位救護車的前輩。師兄們，下次再見！
「翠綠遠足隊」http://www.hkeht46.com/index.html
「黃金歲月之千山我不獨行」http://www.rthk.org.hk/rthk/tv/goldenage2007/20071113.html
2007年11月17日星期六
跟外隊行山
11月15日星期四，早上8點前已經抵達西貢巴士總站，為的是跟外隊「千禧遠足隊」行山，嘗試適應外間節奏，挑戰一下自己體能。行程路線係：— 首先自費（HKD15/位）乘街渡往東丫（糧船灣洲）起步，沿岸綑邊山路出萬宜水庫西壩，大休後再穿越山林經起子灣、上文物館出北潭涌散隊，全程行4個鐘。
時間尚早，間茶餐廳食過早餐，然後OK買多支飲品「參蜜」＆一包朱古力旁身。
0830hrs.走到集合點已經見到領隊和幾位隊員。我當然向領隊報到及自我介紹，希望佢地俾我跟隊。言談間先知佢地每次行山都有成100人。當其他隊員陸續出現報到，我發覺八成以上年紀都有60歲或以上，只有大概10個人係後生少少。
跟外隊行山，當然預冇人同自己傾偈，更加冇人理你，因為佢地章程度都事先聲明「不設保姆式服務，量力參加，不設殿後」。好彩，行冇幾耐，有一位Wang sir全程鼓勵我，同埋照顧我，佢亦都係第一次跟隊，但佢體力比我強好多。
講開速度，不得不提行我前面班老人家，大概有五六十人，竟然拋開我地成半個鐘路程，果然犀利。當我行到北潭涌「發記士多」終點，班人已經坐車出西貢市區飲茶喇。
總結呢次行山過程經驗係好開心，好寶貴，係有用。好慶幸認識Mr.Wang sir。若有機會而路線適合，一定再join外隊。
2007年11月14日星期三
又一個風和日麗的日子
11 Nov 星期日，約好銓老闆、Jenny、阿榮、楊滿樑、Peter、Lin Lin、豬仔包、阿果、阿勝、潔華同埋我，總共11人，早上0900hrs.荃灣兆和街合發（翠華）餐廳食早餐等。埋單時，阿榮話請食早餐，理由係佢最遲蒲頭喎。之後就對面搭81號綠色專線小巴上城門水塘行山。原本潔華計劃圍繞水塘行一圈，因為怕大家好耐未行過，體力有限。但我就大膽建議更改路線，不如由城門水塘行去川龍。結果得到眾人贊成。
小巴總站側邊公車路往上行，唔使幾分鐘，就見右手邊有度鐵bar。喇，繞過鐵bar上山就喇，行冇幾耐會見到大大牌坊「龍門郊遊徑」，呢度就係入口喇，全程大概2-3個鐘，睇你速度。一開始就係上石級，呢段斜路大概有400米，對少運動人講都算甘；但過呢一關，後面段路程就easy執喇。
我地呢班人好耐都冇一齊喇，今次目的都係約埋出見面，吹水，而且係冇約事後打麻將，呢樣都算罕有喇。其實咁健康活動係有理由搞多d。要維持30幾年友誼，一d都唔容易，下次如果有活動，都希望有你參與。
話說呢程「龍門郊遊徑」係相當熱門路線，沿途有林蔭，有風景，又有小橋流水，鳥語花香，心情都靚d。我地當日都不斷遇到d行山人士由川龍行過。所以我地都不約而同話下次不如約早d上川龍飲早茶，然後行返城門水塘。又或者繼續向其它方向行，適隨尊便。
最後，大概1300hrs.行畢全程，川龍路口搭返綠色小巴落荃灣。呢次就由Peter哥請飲茶，理由係阿Lin上次贏麻將。睇怕下次我都要番個理由……
訂閱：
文章 (Atom)
