元荃古道

昨日星期五（19/10）係重陽節公眾假期，日前已經約阿榮同埋Allen行山。今次撰富挑戰性路線—「元荃古道」，由元朗大棠郊野公園出發，一直行到荃灣廣安醫院為止。咁樣就可以避開荃灣一大段上斜（事後先知一樣咁甘）。

大家約好早上10點半荃灣西鐵站集合。原來Allen仲帶埋屋企人同一班親戚。加埋我同阿榮，total係8大6細，最細個男仔都超過10歲。一大棚人元朗舊墟冬菇亭食飯，之後用＄120包架紅色小巴直入大棠郊野公園。呢度要補充，其實搭小巴每位係＄4.0，小巴終點站係大棠巴士總站，落車後仲要行一大段路先至到郊野公園。如果撰坐綠的，車錢亦大概＄40。

入正題喇，一開始非常好行，有成個幾鐘係石屎路。每隔一段路或者有分叉路，都會見到方向指示牌，上面刻有哩數同所需大約時間；等你有預算，又唔會迷路。政府小小設施，市民大大的方便。我地一路行，到一個有涼亭，有水渠，又有小橋草坪稍作休息。聽Allen講，東江水由呢度灌入大欖水塘。

休息過後，行冇幾遠就進入全程最甘一段路，要上石級，又要行泥沙或者碎石山路，差唔多要行成個幾兩個鐘，非常命。14人之中，體能最差就係我，途中多謝其他人鼓勵，同埋等我。所以呢度提醒各位屬「老弱傷殘」一族，要考慮清楚先至好撰呢條路線。當然，行到中途都可以選擇其他出口，譬如大欖水塘、清快塘，田夫仔等。我地中段飲水休息時，巧遇一隊踩爬山單車發燒友。傾開偈，知道佢地屬HKMTB，由大帽山踩落。其實一路行，迎面都遇到好多行山友。

不斷上斜，到最後一個山頂，風景靚，個view開揚，右望「青馬」同埋「汀九」橋，整個荃灣就左手邊。呢個地名漁農處楝個牌叫「石龍拱」。大家休息好耐，睇完風景，就係落山喇。

本來落山應該好easy，冇乜好講。之不過，響最後一段廣安醫院對上，大概400公尺極斜路加樓梯級，咁就令到幾個有腳患男士舉腳為艱，個個行到依起棚牙。各人落樓梯方法都唔同，有人扶欄杆，有人倒後落，我就跳住落，種情景都幾搞。但係女士同埋d細路就完全冇喎。

一大班人廣安醫院分道揚鑣散隊。好彩阿榮叫個大仔車接我，一刻，我對腳根本都唔聽使。不過，山係要繼續行。下次見。