梧桐寨探險

10月22日星期一，應張國樑邀請行山，目標係全港最靚瀑布群，大埔梧桐寨。當日上午1130hrs.我地荃灣地鐵站上蓋搭51號巴士到荃錦公路坳頂大帽山郊野公園落車，然後再向山頂雷達站進發。由呢段大斜路向上行到梧桐寨小路入口，就足足行個半鐘。我地小路入口涼亭稍作休息，就落梧桐寨，開始今趟「探險之旅」。
遊梧桐寨當然係睇瀑布啦。由上而下分別係：散髮瀑→主瀑→中瀑→井底瀑。今次因為係閒日，並非公眾假期，沿途冇遇到其他行山人仕，我地可以自由地欣賞景色，聽聽水聲，同埋取景影相。4個瀑布氣勢、高度同面積各有不同，留待大家親自前往評價。沿途都有清晰方向指示牌，唔會迷路，放心按指示行啦。
剛才用「探險」形容今次之旅，係因為「散髮瀑」與「主瀑」之間，經過多次山泥傾瀉，原本山路已經完全消失，全段路程都滿佈大石、細石或者係碎石。而且梧桐寨山谷環境長年有水氣，樹木生長茂密，陽光稀疏，令到d石面都長滿青苔。當時情況正如張國樑形容，我地好似入熱帶雨林。搞到我行起更加要小心，又爬、又坐、又扶，避免跌親。所以漁農署度楝危險警告牌，叫遊人唔好行入去。之後由主瀑落中瀑，再落井底瀑，就只係行石級，雖然都有上有落，有耐力就得喇。
最後經過「萬德苑」到達梧桐寨村。繼而撰左邊村路，冇幾耐就行出去林錦公路。時間已經係黃昏大概1700hrs。如果想去大埔，可以馬路對面搭25K專線小巴去太和火車站或者64K九巴去大埔墟。又如果想去元朗或荃灣就無需過馬路，左手邊對上少少就有個巴士站搭64K經上村出元朗；石崗上村有51出荃灣＆251M去青衣機鐵站。